دارميات للعيد..الى كل المحبين

أقدملكم اليوم مجموعة دارميات للعيد
وكل عام وأنتم بألف خير مقدما

الگلب گبل الناس
إتعنه دارك
ملهوف اجاك ايگول
عيدك امبارك
==============
گالولي اجاك العيد
چا ليمته اتهيد
عيد اليمر بجفاك
ماينحسب عيد
==============
تدري آنه گبل العيد
عاشورك اوياي
حاسمها لو مو عيد
ماتضحك اشفاي
==============
صايم على فرگاك
غيرك فلا اريد
أفطر أنه بملگاك
وك شوفتك عيد
==============
كون الفرح ينباع
واشريلك العيد
يالشوفتك عيدين
عيد احله من عيد
==============
بالعيد اشوفك وين
يالشوفتك عيد
مشتاگه روحي اليوم
وتشوفك اتريد
==============
هاك العمر واختار
من عنده شتريد
بس كون اگضي اوياك
صبحية العيد
==============
العيد اجانه العيد
اشلون اهنيك
أهديلك آنه العين
لوبيها اخليك؟
==============
إنتي الذهب والماس
والجوهر انتي
والدنيه تصبح عيد
كل ماضحكتي
==============
بالسنه ثنين اعياد
أسمع يگولون
وكل ضحكة منك عيد
ياحلو العيون
==============
گالولي باچر عيد
إلمن تعايد
مادروا إنته العيد
وبگلبي گاعد
==============
فرحة وسعادة انطيك
بس گلي شتريد
ومني اخذ بوسات
من هسه للعيد
==============
عيدية الك بوسات
ما منها موجود
تطبع على الدلال
لامو عالخدود
==============
خلني بعذاب الشوگـ
مارايد العيد
چي لنك انته اليوم
عن عيني ابعيد
==============
الصايم يتاني العيد
لهلاله ينطر
بس آنه اصوم اعليك
وبجيتك افطر