أدرس يا وطن انا امتحنتك ليش
المفروض منك تاخذ انته اعفاء
ناجح مدري راسب مدري طحت اكمال
مجموعك شعب شيجمعه صار اجزاء
اقرالك درجتك كلها بالتفصيل
واطيك النتيجه وتفرح وتستاء
خذت باللغه ميه عالعروبه البيك
وصفر كل العرب من الالف للياء
لان كلك قواعد يا وطن مملوء
صرت أشطر بلد عمي انته بالأملاء
ولهذا السبب كسلان بالأعراب
ولهذا السبب ليهسه ماكو أنشاء
أمريكا وأختها يرفعن الخيرات وينصبن قواعد ترسن البيداء
وفعل ناقص تعربه وشعبك المسكين مفعول به بل حتى بالآباء
والفاعل تعرفه وتبني للمجهول تحالف مستتر تقديرهم أعداء
وبغداد واختها أعربهن بيا حال مكسورات خاطر هيه والحدباء
واكسل بلد انته بالرياضيات يحكمونك جبر وتكول أستفتاء
وأحنا بدائره وطول المحيط اذياب والمركز عميل ونص قطرنا أعداء
مثلث سني جنه وشيعه متحدين كسرت ضلوعنا وما مكتفي بما جاء
اضربتنا وقسمتنا ونقصتنا اهواي وبعد ما ننجمع حاصل جمعنا اشلاء
وباوعت اعلى شعبك شفته كله اموات واطيتك صفر يا وطن بالأحياء
وعفيتك بالزراعه وهسه اكلك ليش لأن صارت فحم كل أرضك الخضراء
ولأن أكثر بلد بيه تنزرع عبوات أسئلة الزراعه تحلها بالكيمياء
ودرجتك مو صفر مية صفر بالدين بيك حسين ميت والطغاة أحياء
وبيك العسكر ي ومحد يزوره ابطيف مسجون ابحضرته بلا سقف جرداء
وخيرك ينسرق سراقه معروفين حتى الأعمى أسأله يكلي هؤلاء
ولا فتوى اسمعت من كل رجال الدين وسماك من العمايم تنفرش سوداء
حسرتنا على حقنا وحقك المسلوب ابكبر حسرة فدك عد فاطمه الزهراء
لازم يا عراق تعيد بالتاريخ أكتب من جديد وأمسح الأخطاء
خلص عمرك حرب عن ماكو شي ملموس أكتب مات داحس وأعقر الغبراء
وامسح كل رشد بيه غلفو هارون وأكتب مو رشيد أبله وابن بلهاء
وعوف الجامعه ومن عمرو موسى ارتاح وامسح كل حرف بيه أوهم الأبناء
وأمسح كل بلد ضم راسه وكت الضيج وامسح كل رئيس ودولته الخرساء
وأكتب مو عرب كلهم مسخ للضاد كلهم مو بزر امتي السمراء
موضوع: ادرس ياوطن 
الخميس نوفمبر 19, 2009 2:36 am
