زغيره وما تعرف تحـــب ولا دغـدغ قلبها الشــــوق
زغيره بشط هواها الروح ودوم معاتت اويه الموج
زغـــــــيره وحســـــبتي جبــــــيره ..
يا صاحب ما أظنها تفّل ..ولا اظن يحصد اليشتل
تصــد مــرّه وأعاتبــها .. تراضيني وترد تجفــــل
لا غلطه البدت مني .. ولا كلمه الكلت عنها ولا عني
أهيم وما أكول أرجع .. تجي يمّي وتجابسـني
أنام وبلجي ساعه أهجع .. تجي بطيفي وتفززني
وأحس بحركه بضلوعي .. وتضل تدي وحنين تصب
وأكول هذي هم قسمه .. زغيره وما تعرف تحب
جثيره أيام يا ناس وآنا هالحاير .. لا شوره التدليني ولا شاير
واشوف الناس كلها عـزاز .. وآنـــــــا وحيـــدهم بايــــــر
اشـــجاني وكوطرت بيها؟
أوادم وشت عليّ .. مثل ما وشـــت عليها ؟
لا ماكو عواذل .. العواذل ما تحاجيـــها !!
عرفته اللي جــان واشـــيها .. !!!
ولك يا صويحبي استاذي يحـوم ويـدور عليها
تحاجيه ويحاجيها .. تناغيــه وينــاغيها
أكول يا صاحبي اسندني .. أشوف الدنيا تتل بيي وأتل بيها
ولك يستادي ريّض .. يقــــول هالنـاس شعليها
حســــافة اســـتاد .. جنك ما دريت بحسبتي وياها
حســــافه اســــتاد .. قلبي اللي هواها شلون ينساها
شـــكول عليك يا استاذي .. شــريد أدعي ؟
عسى انك بيش
بالحسرة التحز بكَليبي وبضلعي
بالعبرة التسيّل عالوجن دمعي
بالضحكات بالجلمات علمعبر
نار وبالضلع تسعر
عسى انك بيش يملذون يلن كل جلمة بالدفتر تذكرني بهواها اكثر
واذكرنهه احبنه
وحك عيناك يا استادي وعلي الشرجي احبنهه
انشد عليك أبو حزامين لا توصل بعـــد يمها
شـــتريد انطيـــك شـــهديلك ..؟
الك كلبي وكــلبي عوسج ابهمها
الك روحي وانت الروح ظالمها
تريض وانعل الشيطان .. واسمع نخوة افادي
لو هذا الحجيته وياك ما ينحاج يا استادي
خل يشهد علي الهــادي
احرم عليك حتى طبة النادي
وشحدهة وتكَلك طب زغيرة وما تعرف تحب
اشوف الناس كلهة الناس تركض علسراب تكول هذا الماي وما مش ماي
وانا عليمن اكَنطر داي فوكَ الداي
ولفي وما يهمة بجاي
لجن انا يا بعد جلاي موش استاذ
ولا بيدي امر ذيج وهاي
وما اكَدر انجحنها لو سـاعه اضحكت ويــاي
ولا أقدر اسقطنها لو صــدت تـريد جفـــــاي
انا منين أجيب الشهادة منين وارضي بيها هواي
وأنا حسره عليّ يا استادي شربة الجاي
بس عندي كليب يا محلاه .. ألف حسره التحز بجلاه
وعندي تركه من بكايا الروح جثيره جروح وتصيح الدّاد
خطيه بركبتك يا استاد
جرحي ما يلفه ضماد .. ولا اظن قصتي على البشر تنعاد
هذي قسمتي من الله مو من واحد واعتب .. زغيرة وما تعرف تحب
رد الاستاذ:
عيش ابخت واحجي ابخت وبوكَ ابخت مكَرود يالمالك بخت تتعب وتركض علولف تاليها تكعد عالتخت
صدكَ يالتنشد عليها ودمع عينك حرام يصب
صدكَ يا فلان زعطوطة زغيرة وما تعرف تحب
زغيرة ولعبت عليَّ زغيرة وعذبت كَلبي
شفتها ابدرسي مو راحة تصد عين وترد تربي
تشيل اصبعها بالعمدا .. شحلاة اصبعها يسبيني
واحس بدمها اليدبي واجاوبها وترد تسال
واشوف منادس الحلوات ياذيني
واحاجيها واكَول لكَيت مكَصودي
شحلاة الرد تدك ايدي وتسليني شسولفلك
اخاف تطول سالفتي
على ساعة لني غركَان ابعواطفها
احبج كالت حبيب اريدج كالت اتدلل
احب ذبة سوالفها اكلها شلون وانة استاد
اكلهة شلون اطب للصف اخاف حجاية العذال لو واحد يخالفها
يا عيب العيب كالت غصبا على الناس
احبك واعبد الدفتر اريدك واعشك الجلمة التوالفها
مشيت برجل تستاهد الجنة اثاريها بكبرها تطب
صدك يالتنشد عليها ودمع عينك عليها يصب
صدك يا فلان زعطوطة، زغيرة وما تعرف تحب
عليمن تنخة ابو حزامين وتوصي بعلي الشرجي وعلي الهادي
وتريد تحرمني غصب من طبة النادي
يا حيف عليك وانت مشورب وراهي
ويكولون الفهم عندك
ولك وين الفهم باليفرض بروحة على محبوبة ؟؟
الفهم يا فلان من يعرف معاني الحب على دروبة
العشكَ يا فلان من روحين وسط الريح مصلوبة
العشكَ رد وبدل يا فلان
لو بالكَوة جا صار العشكَ طوبة ..
اعاتب .. والعتب ياذيني ويذبني
اعاتب لجل عينك مو لجل وحدة تعذبني
ترة انة هم مثلك ظليت مدوهن وحابر
انة الظليت ارد للضيم جبحاتة
انة الظليت ذاك الكَال
لا ردنة ابو عليوي ولا بينت مسحاتة
رد الطالبة
جبيرة انة جبيرة وعدكم زغيرة
زغير الماعرف امرة وتدابيرة
زغير الوكَع حظة وبكَة بحيرة
ولك والحبوا يكولون ؟
لو مال الغصن حدرة يا طير اطفر لغيرة
جبيرة انة جبيرة وعدكم زغيرة
زغير انت .. زغير وماتعرف تحب
نسيت شلون اتلكَاك من تجهب
هنا يلاهي وماعرفت اشلون تلهة
هنا يساهي وما حسبت حسابك الهة
ساعة الكَيك يم سوسن
ساعة الكيك يم زهرة
تعال اكرب اعتبنك ولو مرة
تعال اكرب تعناني اشوفك جرحك اشكبرة
تعال وصير عطابة
تعال وجم تعال وما نفع وياك وانت على ضحجات العليلة
شلون مسترطب
هذا انت وتكلي زغيرة وما اعرف الحب ؟؟
شنهو الحب ؟؟
شتريد تكول .. شتوصفة ؟
المخلص يجيب الماي من الغيم لو لحظة عطش ولفة
لا تطري دروب الحب عليك محرمة وكلفة
ادري بك طري ذبلان ادري بك شبه سعفة
تميل وية الهوه لو مال
ماريدك بعد حيال ظل اسمع حجي العذال
واشبع لوم كلمن كال
المايعرف تدابيرة حنطتة تاكل شعيرة
جبيرة انا جبيرة وعدكم زغيرة
هذي قصتي وية فلان .. لاجن دشوف اشجان
استادي يصول يجول يدور ابحومة الميدان
يعض اصبع يظل سهران .. عليمن ؟؟
شنهو البدر مني وبان
يا ناس اسمعوا قصتي
شلت ايدي لجل فهم الدرس مو لجل حرشة غايتي
وجيتك مرة لو مرتين للغرفة
مرة توصفلي طريج الحل
ومرة مدري اشجانت الوصفة
يا عيب العيب تحسبهه سوالف شوكَ ولهفه
خلف الله على الدلاك عايزهه بعد زفه
حرت انه يا هل وادم بين استادي والطالب
من مثلي على الصوبين دتحارب
بعت انه وشريت النوم ولا فد يوم
اريد الناس ينسوني
اريدن تغمض جفوني
حيرانة الدرب دلوني
لا يوم اليمر يومي مو راح اشكَن هدومي
يا ربي شلون هلحيرة
جبيرة انة جبيرة وعدكم زغيرة
موضوع: زغيره وما تعرف اتحب للشاعر فرات الشمري 
الخميس نوفمبر 12, 2009 12:43 pm
